lunes, 24 de diciembre de 2012

¡FELIZ NAVIDÁ A TOOS Y TOES!

Espero que lo paséis per bien estes Navidáes con toos los vuestros familiares. ¡Felices fiestes!


viernes, 14 de diciembre de 2012

DECISIÓN

El mundiu taba sordu a les povises del desencantu, a les migayees de la traxedia. Una caxera de supermercáu, una xofer de bus - ¡nun da más! - redimíen el so pecáu de ser muyeres recibiendo salarios inxustos nun universu fechu con dimensiones masculines.
Aquella rapaza anónima, d'uniforme de tonos buxos y güeyos d'océanu. sintió que la esplotación diaria diba calistrado metales el so corazón. Foi cuando tomó la decisión. Viérala escrita no más fondero del so ser. Depués de muncha vida secuestrada, arrincó la so bata de trabayu y aventóla lloñe. Dexó atrás la so esclavitú y surdió afuera, a recibir la lluz na so tiez. Entos sintió que yera muyer, que taba viva.

(Miguel Solís Santos)

VIESCA

Ella sabíalo de sobra, que na viesca había llobos. Cómo nun diba sabelo. Eses coses, les madres sábenles. Y yo diba y venía y ella quedaba en casa, esperadndo por mio pa, pero nunca una palabra me preguntó, de nada. Y yo a la que-y lo contaba yera a mio güela, eso sí. Les tonteriúques y too eso. Pero dicíame ella que, total, merecíame a gracia, l'otru día. Y llevéla e coche hasta ellí, por dar un paseúcu. Por sacala. Que debe ser la primera vez na vida que quier venir conmigo a nengún llau, nin dir al médicu, siquiera. ¿Y cuánto habrá, a La Cerezal? ¿Cuatro? ¿Cinco kilómetros? Nun llega. Date cuenta. Pero tábamo ellí les dos sentaes a la puerta, naquel silenciu, y nesto va y diz ella, mirando así pal camín, como p'allá alantrono:
- Nena... Por eso, que grande ye' l mundu, eh...

(Monstserrat Garnacho)

viernes, 7 de diciembre de 2012

La pongueta (Felpeyu)

Pela baxada a Sellañu
dibes dexando la vida
pendirriba pendibaxo,
goxes, macones y paxos
de Cazu pa Les Arriondes.
Pela baxada a Sellau,
nun requexu, Ponga entero,
pendirriba pendibaxo,
el to saber na to fala
y un fardaxáu de llamentos.
Nun sé que viera nes sayes
que de nenu m'envolvieran:
señardá, besos y ciñu,
mimos, calor y conciencia.
Faigo por vete
peles calles, nos lletreros
y na fala de los vieyos.
Faen por borrate
de los mios güeyos y manes,
peru nun son quien a ello.
Pelos requexos de Ponga
yá nun pasa la goxera
pendirriba pendibaxo,
el so saber ya reposa
camín de que s'escaeza.
Dende'l Suanciu, Ponga entero 
ye foriato en casa d'ella,
pendirriba pendibaxo,
colos nomes camudaos
en daqué fala estranxera.
Nun sé lo que deben ver
que-yos dan mieu los palabres
a los que tienen el filu
del to resuellu nes manes.
Faigo por vete
peles calles, nos lletreros
y na fala de los vieyos.
Faen por borrate
de los mios güeyos y manes,
pero nun son quien a ello.
Naguo por vete
peles calles, nos lletreros
y na fala de los vieyos.
Faen por borrate
de los mios güeyos y manes,
pero nun son quien a ello.

lunes, 3 de diciembre de 2012

Una de mieu (Xentiquina)


Esnala que t'esnala
va un esperteyu,
salió de la ventana
d’aquel castiellu.

¡Ai qué mieu!
¡Vaya mieu!
Nun voi ser quien a dormir
¡Que non, que non!
Nun voi ser quien a dormir.
Rellámpagos a esgaya
vense nel cielu,
qu'allumen venti bruxes
en plenu vuelu.