Lección de gramática

¿Cómo se diz uolof la palabra frontera, la palabra
patria? ¿Y en sonike? ¿Cómo-y llamáis al desamparu?
Si queréis dicir en bereber, por exemplu, "yo tuvi una casa
nun arrabal de Rabat" ¿ponéis nesti orde la frase? ¿Cómo
se conxuguen en bambara los verbos que lleven al norte,
qué axetivos-y cuadren a la palabra mar, a la palabra muerte?
¿Cómo se pronuncia en diakhanké la palabra exiliu? ¿Hay que
xuntar los llabios? ¿Duelen? ¿Qué pronombres usáis pal qu'espera
na playa, pal que regresa ensin nada? Cuando señaláis p'allá, pa contra
casa, que alverbiu escoyéis? ¿Cómo se diz na vuestra, na vesa llingua
la palabra futuru?

Berta Piñán